14 करोड़ 56 लाख के बैंक घोटाला मं एक अउ आरोपी गिरफ्तार.. 
बेमेतरा के इंडियन ओवरसीज बैंक मं साल 2022 मं होय 14 करोड़ 56 लाख रुपिया के बहुचर्चित बैंक घोटाला मं पुलिस ला एक अउ बड़ी सफलता मिलिस हे। फरार आरोपी विनीत दास ल तमिलनाडु के तंजावुर ले गिरफ्तार करके बेमेतरा लाय गे हे। पुलिस के जांच मं सामने आइस कि तत्कालीन शाखा प्रबंधक अऊ ओकर साथी मन फर्जी कागज, बिना जांच-पड़ताल के लोन, मरे हुए मनखे अऊ किसान मन के नाम मं ऋण मंजूर करके करोड़ों रुपिया के गबन करिन। जांच मं बैंक के रिकॉर्ड मं हेराफेरी अऊ नियम-कायदा के खुल्लम-खुल्ला उल्लंघन के बात घलो सामने आइस हे। पुलिस के कहना हे कि जांच अभी घलो जारी हे, अऊ जेकर घलो संलिप्तता सामने आही, ओकर खिलाफ कानून मुताबिक कड़ी कार्रवाई करे जाही। ये घोटाला ह बैंक ऊपर भरोसा करे वाले आम जनता अऊ किसान मन के विश्वास ल गहरी चोट पहुंचाए हे।
